政壇：搞搞政：泛民喊打葉建源
教育界議員兼教協總幹事葉建源前日同中聯辦喺銅鑼灣一間酒店會面，隨即被人質疑事先冇知會泛民，又鬧佢政治敏感度不足，各方喊打，嚇到葉建源話下次一定會同泛民「單聲先」，戒懼到差在未匿落枱底。遭遇好似慘過做賊，泛民呢啲應該叫獨裁定叫白色恐怖呢？
設計圖片及對白
備受各方指摘下，葉建源尋日聯同教協會長馮偉華開記招詳述會面始末。佢話喺四月底收到中聯辦官員約佢會面嘅電話，隨即喺教協常務會議報告情況，訂下唔喺中聯辦見面等三大原則。又發過電郵畀教協七萬位會員，告知有關會面安排。前日下午三點鐘，佢哋會面接近兩個鐘，葉強調，香港人唔要一個有篩選嘅假普選，而中聯辦就重申，將來嘅普選方案應該得到中央政府及香港市民嘅「雙認許」，又呼籲社會各界把握機遇通過政改方案。
葉建源形容，會面氣氛尚算互動，但仍然流於各自表述，雙方立場亦未見有改變迹象。
雖然有泛民批評佢「好可疑」，但佢解釋事先無通知傳媒只係技術上嘅考慮，唔想喺一個混亂嘅情況下開記招，強調今次並唔係密室談判，亦唔係想隱瞞公眾，相信事件唔會影響泛民之間嘅團體關係。
