政壇：拉布戰投錯票 議員鬥甩轆
立法會審議財政預算案撥款爆發拉布戰，尋日進入第十二日，議員仲係繼續表決由「拉布」議員提出嘅千幾項修訂案，連日來，議員雖然撳掣表決，操作好似機械人咁，但都只係完成咗一半，投票之路仲好漫長。不過，啲議員尋日已見頻頻甩轆，行政會議成員林健鋒（Jeffrey）一早就發現機件疑似出錯投錯票，搞到要向主席申請更改投票結果，之後又見鍾樹根亦投錯票，咁真係要畀個「頭獎」佢哋至得哦！
設計圖片及對白
會議進入表決程序之後，議事廳又見啲議員行出行入，尋日早上，一度更見議員疏疏落落，有議員好唔滿意啲人唔開會，又要響鐘召喚議員歸位。由於修訂案太多，議員撳掣投票都麻木晒，唔少建制派議員喺投票掣上做手腳，譬如建制派就遮咗支持或棄權，一味反對就啱喇。
支持停發強積金？
尋日朝早，Jeffrey就出咗問題，支持削減康文署員工全年強積金預算開支。莫非身為立法會商界代表嘅Jeffrey覺得強積金加重商界負擔，所以認為政府應該停止向員工發放強積金？原來係擺烏龍，佢解釋，自己並唔係支持政府停發強積金，當時佢一如其他修訂案咁撳反對個掣，但表決機竟然顯示佢投贊成票，事後已經要求主席更改投票結果。
無獨有偶，鍾樹根亦投錯票，一時睇漏眼，變咗支持削減食物及衞生局長高永文六個月薪酬。由於佢哋及時發現出錯，要求改正，議會又要停低嚟處理，結果前後又浪費約兩個小時表決時間。或者佢哋學吓譚耀宗，用膠紙遮住支持同棄權兩個掣，咪冇咁易出事囉。
