遠足徑暗藏陷阱 漁護署失職靠害
「小心地滑,注意安全。」就算大廈地面濕滑,管理處都識得戙個警示牌出嚟,提醒大家小心,可惜港產官僚連呢啲常識都冇。呢,日前連場大雨,部分遠足徑隱藏山泥傾瀉及塌樹危機,當局居然闊佬懶理,又無豎立臨時圍欄,又無豎立警告標誌,搞到行山人士隨時誤闖死亡陷阱,你話係咪靠害吖?
話說連日大雨之下,漁護署上星期二起暫時關閉受山泥傾瀉及塌樹影響嘅八條熱門遠足徑。本來呢,封徑可防止誤闖,不失為有效應變措施,可惜,漁護官僚辦事馬虎,做啲唔做啲,有關措施根本形同虛設。嗱,本報記者日前到過被視為有危險嘅城門郊野公園衞奕信徑第七段及西貢西郊野公園嶂上郊遊徑視察,發現出入口處無攔無阻,除咗告示板貼出一張A4紙咁細嘅通告之外,再無其他告示板通告行山人士。咁樣就叫封徑?太一叮真係封漁護官僚做偶像咯!
係人都知,警示字句愈大愈好,愈當眼愈有效,而當局所謂嘅封徑通告唔止毫不起眼,字體仲好似烏蠅咁細隻,貼咗等於冇貼嘅啫。難怪有立法會議員批評當局敷衍塞責,認為遠足徑應該豎立標誌或者圍欄,防止誤闖,否則一旦發生塌山泥意外,行山人士隨時「有入無出」!
漁護署點解釋呢?佢哋話,今次受影響嘅八條遠足徑中,部分路段設有路障帶,部分則只圍封山泥傾瀉附近範圍喎。叮,保障市民安全都可以做啲唔做啲嘅咩?既然漁護署咁鍾意偷工減料,不如出糧都出啲唔出啲吖,好唔好?
咪話太一叮唔提醒,遠足徑危機處處,一旦出事唔係講玩。好似衞奕信徑第七段咁,專家發現部分斜坡泥土含水量極高,隨時有倒塌危機,萬一行山人士遇上山泥傾瀉或塌樹事故,當局到時至嚟補鑊就太遲嘞。
所以話啫,官僚靠得住,豬乸會上樹,港產官僚真係信唔過。漁護署明知遠足徑潛藏危機,封徑工作居然求求其其,歸根究柢,就係官僚衙門懶散成風,根本冇人認真做事。呢,當局驗樹馬虎就係另一個例子喇,明知塌樹事故時有發生,驗樹工作居然敷衍塞責,結果多次搞出人命。港產官僚但求交差,得過且過,講得好聽叫玩忽職守,講得唔好聽就係草菅人命!
針唔拮到肉唔知痛,如果要港產官僚打醒十二分精神,睇怕要令佢哋嘗吓切膚之痛至得。咁喇,不如罰漁護官僚做人肉警示牌,戙喺遠足徑出入口位置,風吹雨打,日曬雨淋,直到另行通告為止,叮!