做官近三十年嘅立法會議員葉劉淑儀經常要上鏡，衣着飾物一啲都唔可以馬虎，但葉劉話，外人睇佢襯衫有道，其實唔係全身名牌，而且全靠菲傭幫忙。葉劉解釋，佢屋企嘅衣帽間面積大，淨係鞋櫃都裝咗百幾二百對鞋，每晚臨瞓前都苦惱第二日着咩衫應付唔同場合，所以不時會同菲傭商量，日子有功，依家連菲傭都知道「太太」品味，會幫佢配搭時裝。

對比唔少闊太，葉劉唔盲目將名牌着上身。

葉劉尋日突以一襲淺粉紅色連身裙「戰衣」配藍色外套現身立法會，比平日更搶鏡。咪以為葉劉身光頸靚、穿衣有道，肯定將當季名牌全部着上身，葉劉笑言呢對鞋已經有十幾年歷史，好彩依家着番都冇outdated（過時），頸鏈、戒指都係留學史丹福大學嗰陣買落嘅，連一身長裙都係兩年前嘅舊貨。睇嚟葉劉除咗開班、出書教英文，仲可以考慮搭單傳授穿衣之道喎！

第一手消息請下載on.cc東網iPhone/iPad/Android/Windows Phone Apps