城中鏡：名人捐珍藏捐錢撐正生
幫助濫藥青少年戒毒嘅「基督教正生會」前晚舉行三十周年慈善晚宴，籌款一千五百萬元擴建新校舍，呢一晚，影星周潤發、中文大學校長沈祖堯同行政會議成員陳智思（Bernard）嘅媽咪沈時芬等，都捐出珍藏畫作同墨寶籌款。當晚商務及經濟發展局前局長馬時亨（肥亨）帶頭捐出三十萬元，臨場再加碼捐出十萬元投得沈校長嘅墨寶，令正生會一晚間合共籌得四百萬元。
沈祖堯（左）捐出墨寶，馬時亨（中）即場競投，陳智思（右）亦捐出媽咪嘅畫作為正生書院籌款。
十大傑青王嘉恩（左）同鄭家豪（右）及陳兆焯（中）高舉「三十手勢」，賀正生會三十周年紀念。
周潤發冇出席晚宴，但捐出一幅鉑金塗相拍賣，叫價四百萬元。
鄧鍾春華（左）同好友林柏希（中）齊擔任晚宴籌委會成員，搵嚟大家樂集團主席陳裕光太太羅寶靈（右）撐場。
沈校長謙稱係書法初哥，今次以蘇軾嘅詩題字，諗住係咁意嗌價五萬元算啦，點知肥亨即時舉手競投以示支持。肥亨語帶感觸咁話，幾年前曾經參觀正生書院，睇見班學生浪子回頭，非常感動：「人誰無過，班後生仔細個行錯咗路，依家肯回頭，應該畀個機會。」有教無類，Bernard都好支持，前晚割愛捐出媽咪嘅畫作。
陳智思抱恙不忘度橋
正生書院校長陳兆焯（Alman）喺台上爆料，話Bernard喺病中不忘撐學生，早前手術出院兩日就相約見面，齊齊度橋籌錢，搏命到極。中華國術（香港）總會會長王嘉恩（Albert）都有到場，佢近日痛風症發作，但都帶病支持：「我同Alman都係十大傑青，當然要撐啦！」
「鞋王」鄧劍群大新抱鄧鍾春華（Yvonne），亦拍心口做晚宴籌委會成員，前晚拉埋奶奶鄧朱錦韶齊齊支持。Yvonne咁支持正生書院，原來係因為佢同Alman係兒時嘅玩伴，細個經常圍埋玩拍公仔紙，但兩人長大後各有發展，已幾十年冇聯絡，直至近日為籌備晚宴再次重遇，難怪Alman笑言前晚餐飯係「神迹」喎。
