【投訴組報道】禽流感隨時殺埋身,野鳥散播病毒危機卻長期遭部門漠視!為防感染禽鳥疾病,市民不應餵飼野鳥的訊息已透過不同渠道發出,惟各區仍見「愛心爆棚」市民隨意在街頭餵雀。立法會議員炮轟食環署執法不嚴,縱容違法行為。醫生提醒市民,雀糞會傳播病菌,尤其本港人煙稠密更令感染風險大增,危機不容忽視。

長沙灣站常有人將雀粟撒上站頂餵雀,惟檢控數字卻寥寥可數。

大量野鳥爭相啄食撒在地面的食物。

大量野鳥聚集在長沙灣站對出行人天橋頂,等候餵飼。

跑馬地黃泥涌道為另一餵飼野鳥黑點。

野鳥連附近的電車路軌亦不放過,嘗試覓食。

兜路走!!
盧小姐:有人餵雀搞到有好多雀仔聚集,但都未見過政府部門派人嚟執法或者洗地!

曾先生:雖然好彩未試過、亦都未見過有人「中頭獎」,不過平時我都唔會行近佢哋(野鳥),次次都會兜路行!

莊先生:咁多雀仔搞到成地雀屎好污糟,政府真係要加強執法同清潔,始終咁樣好影響環境衞生!

「已經好多年都係咁,有人仲會特登帶啲嘢食嚟餵雀,搞到好多雀仔成日聚晒喺度等食,啲人真係好心做壞事!」居於長沙灣的鄭先生指出,港鐵長沙灣站A3出入口長期有人餵飼野鳥,引致常有大量野鳥聚集,影響環境衞生且帶來傳播病菌之危機,「愈聚愈多雀仔,搞到條路好多雀屎!」

滿地雀糞 衞生惡劣

無獨有偶,位於跑馬地黃泥涌道與禮頓道交界的巴士及電車站亦屬重災區,長期淪為野鳥樂園。在區內工作的陳小姐指出,車站為上班必經之路,疑有人餵飼而吸引大批野鳥聚集,候車人士隨時「中頭獎」,「喺嗰度等車冇得走開,成大群幾十隻雀仔喺頭頂飛嚟飛去,真係一路等一路驚有雀屎滴咗落個頭度!」陳更坦言上址長期滿地雀糞,環境衞生惡劣,「睇見笪地就反晒胃,成地都係雀屎,真係好核突!」

港鐵發言人承認,長沙灣站職員早前亦發現有人在A3出入口頂部放置食物,吸引雀鳥聚集,車站已加派人手巡邏,並採取多項措施,包括放置驅趕雀鳥的設備,並在各出入口當眼處張貼告示,提醒途人勿餵飼雀鳥。職員會繼續留意有關情況,乘客如有發現,亦可即時通知車站職員跟進。

食物環境衞生署發言人則說,過去一年,在長沙灣站與跑馬地涉事位置向餵飼野鳥而弄污公眾地方者分別發出七張及四張定額罰款通知書,潔淨服務承辦商每日均會清洗和消毒投訴所指地點,亦已加強巡查。發言人補充,已在有關地點當眼處張貼禁止餵飼野鳥的宣傳海報。

促派便衣 突擊巡查

「食環署好明顯就係執法不力,有人投訴就多啲洗地同埋巡吓,呢啲咁被動嘅處理根本解決唔到問題,真係抵鬧!」立法會食物安全及環境衞生事務委員會委員王國興直斥食環署處理因循,檢控數字寥寥可數,令公眾地方逐漸淪為環境衞生的黑點。

王建議食環署在餵飼野鳥黑點安裝閉路電視或監察鏡頭,亦可安排身穿便服的職員突擊巡查,「你着住制服係人都知你係食環署啦,好難捉到人,食環署真係要用吓腦先得!」

逢星期一至五見刊

第一手消息請下載on.cc東網iPhone/iPad/Android/Windows Phone Apps