SUN搞作:打橫嚟講:特區問責官員「厚低調」(普通話讀出)
喺天朝強國做官,首要條件,須夠狠貪和難賤;而天朝腳底的小特區又點呢?哦!唔使講,先決條件係聽話無腦,兼超級庸廢外,仲要夠樣衰同面懵。
嗱!看看澳門特別行政區啦!提出高官離職補償已夠反智白癡啦!行政長官任期內享刑事豁免權及長俸的「離補」法案,諗嗰個都應拉去「犬決」啦!居然喺立法會有低能兒舉腳贊成,此等垃圾議員之質素水平,仲衰過東莞嘅城管,又怎會不辣慶市民上街吖?
澳門特區樣衰不堪啦!好兄弟的香港又點呢?
遠的不說,淨睇吓最近嗰件叫「梁敬國」嘅騎呢怪先啦!
吓!「梁敬國」你都唔知係乜水老鼠?
哦!不出奇,連老練政客、識晒全個政府上下甲乙丙的立法會主席曾鈺成也被考起囉!
近日,呢件梁敬國極之風騷,佢自從喺立法會「戥腳」,替老細「蘇收屎」陪坐旁聽長毛議員拉布,而「一炮成名」後,首次再露面,出席民建聯活動時,一見到記者,劈頭喜孜孜說:「你哋實識我咯!」真面皮尺幾厚,足夠資格加入禮義廉的民建聯做頭目也!
梁敬國是商經局的副局長,十幾萬一個月,工作責任係同議員溝通和推銷政策,但呢位仁兄,佢入職撈咗半年有多,居然全場連記者在內都無人識佢,即佢嘅工作表現係零至負分啦!仲敢以出了一大風頭為榮?真要畀蕉餵佢囉!
由一件梁敬國乜水事件,引爆原來香港廢柴政府架構內還有很很多件「梁敬國」此類高薪垃圾。唔知佢哋是否一樣咁衰相兼面皮厚的呢?
彭志銘
次文化考古學家,對城中潮語有深入研究,博徵博引,廢官廢人行埋一邊。
歡迎add我facebook一齊(目及)實政府