設計圖片
政改鬥蠱惑。「佔領中環」行動（佔中）喺六月二十二號會舉行電子投票，由於原有供選擇的三個方案太激，有啲溫和選民話要杯葛，佔中搞手於是「僭建」一條是非題畀市民就普選表態，大意係如果政府提交嘅政改方案唔符合國際標準，立法會係咪應該予以否決。佢哋整多條題目畀人揀，都係想谷高投票率，避免投票落得拍烏蠅嘅場面，呢樣嘢連佔中發起人之一戴耀廷都親口承認咗。
苦肉計冇實際
但另一搞手陳健民又扮晒嘢，承諾若果最終唔夠十萬人投票，就反映佔中行動失敗，屆時佔中三子一定鞠躬道歉、退下火線喎。呢個懶有姿勢嘅說法，其實全冇實際，仲當市民係傻嘅。事關泛民往績顯示，香港大學前年就特首選舉進行嘅三二三民間全民投票，講緊都有二十二萬人投票，一○年「五區公投」投票人數低極都有近五十八萬人，根本要湊夠十萬人投票係「濕濕碎」，佢哋開出十萬人投票嘅下限，門檻真係低到幾乎無，所謂嘅鞠躬道歉唔係苦肉計又係咩？
靠呢啲手段谷高咗投票率又點呢？最多咪將當日有份投票支持公民提名方案嘅市民擺上枱，最終香港同市民都係「雙輸」。有官場中人直指，佔中三子行呢條路根本自打嘴巴，所謂「符合國際標準」可以各說各話，任何提交嘅方案都總有方法證明係符合所謂嘅國際標準，即使政府都可以證明自己嘅方案符合國際標準。講到尾，隨住泛民撕裂，整場佔中運動已經淪為一場投票騷，當年今日話要反映港人民意嘅宏願已經名存實亡，遲早「收檔」。
第一手消息請下載on.cc東網
