立法會紡織及製衣界議員鍾國斌(Felix)尋日出席理工大學應屆畢業生嘅針織時裝作品展時,講到近期越南發生反華暴動嘅情況,佢就話自己冇喺當地投資,亦暫時唔會考慮。佢話知道中國已經撤離咗近七千名喺當地嘅華僑,呢個動作背後一定有原因同用意,佢當然唔希望雙方會開戰,但亦唔排除呢個可能性喎。

鍾國斌(右二)細心欣賞理大同學嘅畢業設計作品。

Felix話,幾年前曾經考慮過投資當地,但比較過中越兩地嘅成本後,發現人工方面相差並非太遠,而內地又有地理上嘅優勢,較近方便啲,而趕急嘅訂單好多時都需要喺內地做,所以佢最終都係繼續將廠留喺東莞,即使嚟緊喺緬甸設廠後亦一樣。

睇完理大學生嘅作品後,Felix認為香港嘅工業有回流嘅潛力,但唔係鬥平,而係要發展高品質或高水準嘅產業,例如針織品等。佢話,香港有嘅係出色嘅設計師同創意,應該好好利用呢個優勢,好似意大利製造皮具咁,一聽就知有一定質素,其他地方好難取替,而便宜嘅貨亦唔會見到生產地係意大利,所以本地都應該朝呢個方向發展。

第一手消息請下載on.cc東網iPhone/iPad/Android/Windows Phone Apps