政壇：生命鬥士鍾情中菜點心
沒有四肢嘅「生命鬥士」力克胡哲（Nick Vujicic）尋日同幾名友人現身灣仔「富豪飯堂」食晏，原來佢鍾情食中菜。據悉，阿Nick今次喺亞洲有演講活動，途經香港時，佢就以私人性質逗留咗幾日旅遊，享受本地美食。
阿Nick以左邊身軀自行操控專用輪椅駛入飯堂。
尋日中午大約一點鐘，我哋見有一架二十四座復康巴士停泊喺富豪飯堂門前，只見職員將一部無載人嘅輪椅抬入大堂，無幾耐之後就有一架七人車駛至，幾名男子同一名女子先後落車，而其中一名外籍男子仲抱住個人，望真啲原來就係阿Nick。該男子抱住阿Nick入到大堂之後，就將阿Nick放喺輪椅上面，然後阿Nick就自行以左邊身軀操控部專用輪椅進入飯堂。
當阿Nick發現記者影相時，好友善咁展露笑容，仲郁動肩膀向記者打招呼添！食完飯離開嗰陣，阿Nick身旁嘅女友人話，阿Nick今次只係逗留幾日，因為知道阿Nick想食中菜，所以就特別帶佢去食點心，翌日就會飛去新加坡繼續做演講。
