政壇：公帑遊北歐議員爭崩頭

立法會內務委員會聽日就會討論呢個前往北歐進行議會訪問活動嘅建議，初步建議喺九月十四至二十一號期間前往芬蘭、丹麥同挪威訪問，目的係加強立法機關嘅聯繫、了解呢啲國家立法機關嘅政治形勢、架構及運作、國家嘅政制發展及選舉制度等。

議會聯絡小組委員會預計，每位議員外訪開支約為三萬四千二百或五萬七千六百蚊，具體幾多就要視乎議員選擇坐經濟客位定係商務客位嘞。又係嘅，來回北歐機程咁長，如果富貴議員要坐商務客位，機票價分分鐘貴一倍。而代表團內會有九位議員可以得到立法會全費資助，而自費名額就有七個。

學習聯合政府求同存異

點解揀去北歐呢？有份「提名」目的地嘅小組委員會成員涂謹申就話，呢啲國家都係福利主義國家同實行民主，又可以做到債務下跌、國民生產總值上升，好值得去拜訪一下。何秀蘭就話，呢啲國家都係組織聯合政府，但民生方面又做得好好，可以去取吓經，加上香港面對政改，商界成日怕直選後勞工主義抬頭，所以可以去睇吓人哋點求同存異喎。本港立法會內政黨歧見好深，淨係泛民都成日鬼打鬼，睇吓人哋點樣分歧中求進步，希望可以查找佢哋嘅流弊啦。