事故不斷醜聞多 港鐵加價犯眾憎
年年賺錢，年年加價，港鐵為富不仁，大家早就見怪不怪。本來呢，喺可加可減機制之下，港鐵揸住雞毛當令箭，加價振振有詞，市民就算不滿，都無可奈何，之但係咁，港鐵淨係識加價，唔識改善服務，搞到事故不斷，醜聞多多，咁又唔同講法嘞。今時今日咁嘅服務態度，叫人點樣心服口服呀？
嗱，去年大賺一百三十億元嘅港鐵，宣布下月底起平均加價百分之三點六，今次已經係連續五年加價，加幅仲係五年來第二高添。港鐵話就話提供一系列優惠，包括「都會票」及早晨折扣優惠等，各項優惠據講合共逾五億元喎，可惜呢啲所謂優惠左度右度，只不過係小恩小惠咋。好似「都會票」咁吖，四百元搭一個月，表面好似好着數，其實除咗限定車站使用，而且規定最多只可搭四十程，唔湯唔水；又好似早晨折扣咁，規定早上七時十五分至八時十五分至可享有優惠，而且必須喺指定車站出閘，對於大多數市民嚟講，根本得物無所用。講到尾，優惠姿勢大於實際，口惠而實不至。
即係咁，一分錢一分貨，如果港鐵加價之後，能夠改善服務質素，市民條氣都順啲吖。可惜事實啱啱相反，港鐵管理混亂，幾乎三日一小事，五日一大事，而且一次比一次大鑊。以舊年為例，港鐵向當局提交咗六百七十幾宗事故調查報告，其中六十幾宗係機件故障及人為因素造成，上個月東鐵線先至全線癱瘓三十五分鐘，而且延遲向當局通報，搞到七國咁亂，乘客怨聲載道。仲有呀，港鐵負責嘅高鐵等多項鐵路工程無一不延誤，無一不超支，尤其係高鐵醜聞愈揭愈臭，高層居然無人問責，你話係咪荒謬吖？港鐵咁嘅服務質素，就算唔減價都要凍結票價啦，竟然仲好意思年年加價，簡直唔知醜字點寫。
唔好唔記得，港鐵除咗係上市公司，同時亦係全港最主要公共交通機構，而且港府仲係最大股東，同基層市民日常生活息息相關，點可以唯利是圖？香港交通費昂貴，基層打工仔百上加斤，早就備受詬病，而港鐵唔單止冇負起社會責任，仲經常帶頭掀起加風，唔怪得畀人封為「無良企業」。唔使問阿貴，今次港鐵加完價，其他公共事業機構有樣學樣，隨時出現新一輪加價潮，市民又有排捱咯。
歸根究柢，港鐵之所以醜聞多多，對市民予取予求，皆因港府呢個大股東監管不力，關人個關。所以話，如果港鐵高層要為事故問責，咁港產官僚更加罪無可恕喇，叮！
