城中鏡：街頭「假募」猖獗 王賢誌促加強監管
慈善都有假，據講近日有一批「募捐兵團」由內地殺入香港，利用港人嘅愛心及同情心，假扮籌款騙取金錢。東華三院副主席王賢誌（Vinci）話，未喺街上遇過，但認為慈善團體平日可以做嘅防範及應對唔多，需要由政府加強監管。
王賢誌認為，「假募」黨扮慈善團體，市民好難防範被騙取金錢。
Vinci話，其實政府對慈善籌款活動有一定程度監管，好似賣旗咁，要預先申請，但如果有不法分子冒充成一啲慈善機構於街上籌款，市民真係防不勝防，要靠政府執法人員多加留意。佢話，作為一個慈善團體，佢哋平日基本上係靠累積市民對佢哋嘅認識嚟建立口碑，但講到避免被冒認的方法，佢就話實際上好難做到。以賣旗為例，一張貼紙籌到嘅錢可能只得一蚊幾毫，佢哋冇可能為此製作防偽特徵，不法之徒有心抄襲亦好容易。不過，好在東華廣受市民認識，除日常小型活動外，佢哋仲有上電視籌款呢啲大型活動，所以唔太擔心被冒充。
