城中鏡：擁躉獻妙計銷毀象牙
全球最大型嘅銷毀充公象牙行動早前喺本港啟動，總值達四億元嘅二十八噸象牙眨眼間化為灰燼，呢個行動宣示政府反對象牙非法貿易嘅決心，但一眾象牙擁躉睇見就好心痛。曾經做過象牙生意嘅中華廠商聯合會副會長吳宏斌（Dennis）及新豐珠寶董事長陳祖成（Sunny）都話，政府應該考慮唔同嘅處理手法，唔使焚毀咁決絕。
陳祖成建議將被充公嘅象牙拍賣做善事。
吳宏斌家族八九年後停止經營象牙生意，但家中保留了一箱箱製成品。
吳宏斌的象牙收藏品造型栩栩如生，佢認為被充公嘅象牙應用作教育或更好用途。
Dennis話，象牙除咗焚燒銷毀之外，仍然有好多唔同處理方式。佢話，雖然象牙來源有啲係非法捕獵，但亦有唔少大象係自然死亡，所以毋須以另類眼光看待象牙工藝品。
當年佢唔做象牙生意後，依家仍有一箱箱嘅收藏，由實用嘅筷子到雕工精細嘅佛像都有。
創造保育雙贏局面
Dennis坦言，被充公嘅象牙銷毀唔單止可惜，更會令市場上嘅象牙價格上升，事關供應量愈少就愈珍貴，無助打擊非法象牙買賣。佢仲話打算去信環境局局長黃錦星，提議佢將象牙攞去堆填區或洞穴掩埋好過，因幾千年後大象可能絕種，到時象牙變成矜貴嘅文物，可以留待畀後人，好過燒咗佢喎！
自言係象牙養大嘅Sunny都好痛心，事關當年佢爸爸做象牙生意養活一家人，後來佢自創珠寶公司，亦曾兼做象牙生意，直至後來國際禁止象牙貿易，佢就全面轉型做珠寶，依家仍持有一批象牙收藏。現時象牙只係不准貿易，但喺香港境內買賣仍屬合法，所以Sunny認為政府可用其他方法處理，例如拍賣畀愛好者收藏，所得善款用於推廣保護瀕臨絕種動物，創造雙贏局面。
