SUN搞作：少膽虫手記：兩個大道理
有兩個人生大道理，少膽虫從小到大都奉為圭臬，第一個就係demand and supply，我甚至認為「供與求」主宰住萬物嘅軌迹。點解本虫有呢個諗法？就喺中學時代，本虫正正係一條溝唔到女嘅可憐蟲，當時我已經明白：我溝唔到女，只係因為世界男人太多，同我人格低劣面目可憎無關，只要天下男人死剩我一人，就會有大把女人撲埋嚟。
呢個諗法伴隨住我成長，亦係我嘅成功之道，因為我揀咗服務一間冇乜叻人嘅《壹全霉》，喺呢度工作，就好似全世界識字嘅得我一個，呵，咪話咁易畀我坐到腦腫位囉！仲有，以demand and supply嘅大道理用喺工作上，可謂事半功倍，例如我會揀一啲新婚或者啱啱買樓嘅同事減薪，令佢哋喺需求穩定嘅情況下唔敢反抗，係咪醒先？
另一個大道理，就係本虫相信力量係逼出嚟。你有冇見到啲探險家，跌落冰川斷晒骨都可以爬番上嚟？又或者貼身啲，你份人工得雞碎咁多，但總係餓你唔死？呢個就係「逼」嘅力量。所以，喺我麾下嘅殘兵敗將，我都會以「淫媒精神，做X死人」嘅態度對佢哋，嚟緊我仲會進一步減省人手，但本虫相信，佢哋頂得住嘅，力量係逼出嚟o架嘛！
