立法會議員長毛梁國雄掟蕉示威就試得多，估唔到尋日卻幾乎「中蕉」。撐政府組織「愛港之聲」二十幾人就趁尋日行政會議前走去特首辦示威，批評有議員騎劫立法會，又鬧四名喺預算案「拉布」嘅議員「快快丟落垃圾桶」，咁啱咁蹺，「爭取全民退休保障聯席」二十幾人尋日都去行會示威，由長毛陪同。唔少上咗年紀嘅愛港之聲成員，一見到長毛就破口大罵，期間，愛港之聲嗰邊有隻蕉飛向長毛一方，好彩距離遠唔中咋。

設計圖片及對白

愛港之聲成員係咁鬧長毛，但長毛都唔肯離開現場，仲企喺人哋面前，反叫佢哋返大陸同飲美沙酮，雙方口角不斷。

我哋事後問番愛港之聲召集人高達斌，佢話當時入咗特首辦示威區，見唔到掟嘢情況，又話唔一定係佢哋掟嘅。雖然無法證實係咪有人向長毛掟蕉，但都令佢體驗到飛「蕉」來襲嘅感覺，算唔算「以其人之道，還治其人之身」呢？

第一手消息請下載on.cc東網iPhone/iPad/Android/Windows Phone Apps