政壇：樹根「鍾式英文」駁英議員
一向被譏中英文皆水皮嘅立法會議員鍾樹根，上星期突然以流利「鍾式英語」怒轟港鐵「老外」行政總裁韋達誠返工「尖明（dreaming）」，因而揚威議會，彰顯其外國大學碩士學位嘅實力外，似乎講英文嘅信心都返晒嚟。尋日佢更罕有夥拍建制派戰友同英國國會五位中國事務小組成員大談政制發展。
多名立法會議員接待英國國會五位中國事務小組成員大談政制發展。
平日呢類活動，通常只有泛民議員熱衷接待，一來佢哋愛好與「外國勢力」交流，二來英文水平普遍較建制派高亦係原因之一。不過，尋日會面不但吸引多位泛民議員，連建制派陣營入面英文水平唔錯嘅梁君彥、鍾國斌及謝偉俊出席，連樹根亦罕有現身。據了解，英方議員相當關注香港政改發展，擔心萬一政改尋求唔到共識，香港管治何去何從？有人直問，英國作為香港前宗主國，香港政改討論是否需擔當更積極角色呢？泛民議員聽到梗係讚好啦，但樹根即時以英文駁斥，大講《基本法》規定等。
我哋問過與會議員，有人坦言唔係好聽得明樹根嘅「鍾」式英語，只係掌握到五成意思，仲擔心英方聽唔慣另類口音，最後可能只係聽得明三成。不過，有議員就大讚樹根今次終於冇再出動「lor（囉）」呢啲典型Chinglish，加上佢發言時配合手勢，總算聽得明。
