政壇：議員（目及）實供港禽菜市場

內地活雞或者下月恢復供港，立法會食物安全及環境衞生事務委員會四名議員尋日去咗長沙灣家禽批發市場，了解中港活雞分流設施，又參觀咗長沙灣蔬菜批發市場，一次過睇晒內地供港雞及供港菜嘅運作。

議員參觀長沙灣家禽批發市場，了解內地雞隻抵港後運作。

本身係漁農界嘅何俊賢（高佬賢）都有份參觀，漁護署向佢哋解釋，中港活雞分開朝早及夜晚運到家禽批發市場，雞隻唔會有自由接觸，但議員都質疑，兩地活雞存放位置一樣，僅靠時間分流，保障都係唔夠，認為打鼓嶺本地活雞分流站啟用前，不應恢復內地活雞供港。

佢哋參觀化學檢驗設施及水耕種植中心時，都關心化驗室僅檢驗蔬菜樣本的農藥濃度，卻未有化驗蔬菜的重金屬含量，高佬賢就話，政府應加強定期抽驗本港農場泥土中的重金屬含量，確保蔬菜食用安全。