政壇：佔領民政署乳鴿潰敗
白鴿黨喺政壇嘅影響力愈嚟愈細，近期一班「乳鴿」喺地區屢次出「激招」鬥出位，其中，中西區區議員許智峰更係表表者，繼上月為抗議區議會涉黑箱審批宣傳《基本法》及政改，瞓身「佔領」區議會秘書處足足四日之後，尋日又再出招，今次就同埋另外幾隻「乳鴿」，出動索帶將自己綑綁喺民政事務總署辦公室，圖「佔領」人哋辦公室，最終搞到被人武力清場，連鞋都甩埋，唔知嘅仲以為白鴿又搞瞓街運動添！
許智峰（左）同吳兆康聲稱被保安武力抬走，混亂中連鞋襪都甩埋。（互聯網圖片）
許智峰（右）早前在中西區區議會上同保安衝突。
許智峰尋日突然再偕吳兆康、許祺祥、黃偉賢、區諾軒四隻「乳鴿」，齊齊踩上民政事務總署（總署），佢哋不滿陳甘美華拒絕檢討區議會撥款機制等安排，尋日係第二波佔領行動，幾隻「乳鴿」堅持要求同總署署長陳甘美華直接對話，但行動只係短短三個幾鐘就潰敗收場。
許智峰一度暈倒
據民政事務總署發言人話，許智峰等人帶埋索帶上門，將自己綑綁喺總署辦公室牆壁喉管上，又將請願標語鋪晒喺地板，帶埋擴音器轟炸總署員工，造成滋擾，屢勸不果下，惟有請保安將佢哋帶離現場。不過，「公說公有理，婆說婆有理」，許智峰反駁自己遭保安強行抬走期間，被粗暴扯爛恤衫兼扭傷手部，連手機屏幕都喺混亂間被打爆埋，送院期間仲一度暈倒添！
白鴿黨喺政改等大議題上，提咗方案冇人騷，政治實力好似愈嚟愈泡沬化咁，啲乳鴿轉行激進路線，有冇用真係好難講，但民政署同區議會嘅工作人員就畀佢哋煩死喇。據講，佔領埋今次之後，許智峰話暫時唔會再搞佔領，會另外再諗方法爭取同陳甘美華會面喎！
