補貼渡輪無底洞 糊塗官僚被搵笨
俗語話，殺頭生意有人做，蝕本生意冇人做，咁點解離島航線聲稱蝕多賺少，一樣有人做呢？原因一字咁「錢」，咪因為有公帑補貼囉。船公司就算點經營不善都好，港府照樣泵水，照樣補貼，咁做究竟係咪恰當，呢個問題就好似渡輪航班咁，斷斷續續，爭議一直未停過。
嗱，立法會尋日討論離島渡輪航線服務及票價調整，有議員就翻船公司同港府舊帳，指六條離島航線由公帑補貼，今年續牌之後居然仲要加價百分之五至六，情況不合理。有議員更批評，港府持續提供補貼，等如幫船公司封咗蝕本門，削弱改善服務嘅誘因，簡直就係捉蟲。
當局點回應呢？運房局副局長邱誠武話喎，六條航線喺一一年起冇加過價，今次加幅低於過去兩年半嘅通脹及家庭住戶入息中位數增幅；又話政府津貼航線繼續營辦，既為居民提供服務之餘，亦為分擔船公司營運成本上升嘅負擔，係微妙嘅平衡喎。
簡直九唔搭八，社會最質疑嘅係船公司獲得補貼之後仲要加價吖！公帑係納稅人嘅血汗錢，離島航線淪為無底深潭，冇補貼時加價，有補貼時一樣加價，咁補貼有乜意義呢？航線營運者一邊攤大手板問庫房攞錢，一邊獅子開大口向乘客加價，即係獲得雙重補貼，港府有冇覺得自己做咗傻仔呢？
即係咁，渡輪航線經營困難，淪為雞肋，呢個係不爭嘅事實，港府為免航線停辦，影響市民日常生活，提供適量補貼亦係無可奈何嘅抉擇。問題係，補貼幾多至合理呢？公帑要用得其所，如果港府唔考慮船公司嘅服務水平，無訂立檢討機制，一味瞌埋眼，係又批，唔係又批，同倒錢落海冇乜分別嘅咋。
講到尾，港產官僚對船公司補貼年年行禮如儀，話為市民着想係假，其實方便自己卸責就真喇。當局只要勉強維持航線服務，咪無需費神改善離島交通網絡囉，反正使嘅係公帑，唔係掏自己嘅荷包，船公司嘅服務有冇改善，收費係咪合理，佢哋闊佬懶理，關人個關。呢，高鐵就係例子，港鐵一句嚴重延誤，造價隨時超支過百億，港產官僚有冇肉赤過吖？有冇問責吖？市民要求設立全民退休保障計劃，港府一直牙痛咁聲，話財政難以負擔，但係監管不善浪費公帑就洗腳唔抹腳，想點使就點使，想揈幾多就揈幾多，簡直荒謬。
好心港產官僚睇住盤數，做好監管工作喇，唔好次次被人搵笨，亂慷納稅人之慨，如果補貼渡輪航線嘅係佢哋自己嘅錢，仲會唔會咁疏爽吖，叮！
