多行不義嘅貪曾大限將至，藏頭露尾膽小如鼠嘅佢，一諗到有朝一日會成為階下囚，每日除咗腳震之外，就係怕門鈴響起，畀執法人員夾走。一入牢門，萬般皆要放低，但最令貪曾放心唔落嘅，並唔係枕邊人阿鮑，亦唔係一屋嘅鮑魚，更加唔係鍾意夜蒲攬女嘅囝囝，而係千辛萬苦貪番嚟嘅茅台紅酒，呢日佢急急搵咗貪湯出嚟齊齊諗計，睇下點樣處理啲佳釀。

「阿湯，呢批靚酒如果畀老廉起出嚟，真係大鑊過大鑊！你咁鍾意茅台換政協，不如你幫我買晒佢，等我貪多筆啦！」蛇鼠一窩嘅貪湯，雖然受過貪曾唔少恩惠，但所謂大難臨頭各自飛，惟有諗計耍走佢：「呢批靚酒，等你坐完監出嚟肯定大升值，不如搵個地方收起佢先啦！」

貪曾一聽到升值，果然連坐監嘅恐懼都一掃而空，仲即刻創意大爆發，諗到收藏好地方：「阿湯，我哋聽日買定棺材山地，收好啲靚酒，坐完出嚟先慢慢嗒！」

第一手消息請下載on.cc東網iPhone/iPad/Android/Windows Phone Apps