政壇：搞搞政：學民思潮核心成員出走
政改啱啱踏入第二階段，前排大出風頭嘅學界論政團體已經傳出「分手」消息。涉及情不投、意不合的組織係學民思潮，我哋就聽聞佢哋有骨幹成員、反國教「絕食三子」其中兩人林朗彥（Ivan）同黃莉莉，以及成員朱偉聰決定分道揚鑣，我哋問過Ivan，佢就承認同學民思潮嘅政改路線唔同，仲話自己嘅睇法喺學民思潮中難以實踐喎。
設計圖片
講到佢同召集人黃之鋒嘅關係，Ivan就形容係彼此「和平分手」，強調唔係分裂喎，其實，佢上月底已經喺社交網站將個人狀況更新為「離開學民思潮工作」，依家只係態度更明朗啫。黃之鋒都承認，佢哋離開咗，但就話呢啲係個人選擇。呢個由學生走埋一齊嘅團體，喺多次示威活動中都大出風頭，點解依家呢個時候會分手呢？
學生圈中都有說法，學民思潮內部有埋堆現象，唔入大堆嘅，倡議當然冇人撐，一個組織要繼續走下去，成員有共識係最基礎嘅，但埋堆現象卻令共識只係代表一部分。或者係咁，幾個核心成員咪一走了之囉。泛民陣營經常鬧內訌，估唔到學生組織都受感染。
