政壇：建制派冷待 海怡西風波

柴文瀚話，唔少南區居民擔心海怡西商場改成特賣場後，區內將會出現大批個人遊旅客，對當地居民造成困擾。佢揚言，如果業主仍然一意孤行，佢哋或會訴諸法律。議員區諾軒亦稱，雖然地政總署已經有書面回覆，但仍然未可以釋除居民憂慮，要求當局解釋改建計劃係咪違反分區計劃大綱圖。

袁彌明帶街坊踩場

不過，委員會主席林啟暉就話，由於海怡西商場涉及私人業權問題，加上地政總署暫時未收到有關改建圖則，認為區議會唔應該討論假設性議題。喺會議開始前，人民力量主席袁彌明（Erica）帶住成班街坊企喺會議室門口外請願，要求林啟暉同當區區議員陳家珮唔好出賣海怡居民利益。