內地電子商貿來勢洶洶，好多人都試過阿里巴巴旗下嘅淘寶，有網友誇張咁話，乜都有得買，最近一宗事例好搞笑，據講係畢加索作品喺淘寶拍賣，而且係真迹添，呢幅係畢加索晚年時創作嘅麻膠版畫《臉》，一蚊開賣，被叫價一百六十五次之後就以近一百一十五萬人民幣成交。
網上拍賣大師名畫，真係令人唔知信唔信好，唔止係咁，成個拍賣得幾個人競價，但就吸引咗超過六百萬微博用戶做塘邊鶴，齋睇冇幫襯。即使係咁，都好有宣傳效應。
