政壇：阻侍產假立法政府捱鬧
男士侍產假立法係勞資雙方嘅最新戰場，立法會有關法案委員會尋日開會繼續審議呢條法例，商界陣營冇乜聲氣，反而工聯會、工黨就齊齊要求將男士侍產假由三日增至七日，但政府話，七日侍產假係違反勞工顧問委員會（勞顧會）共識，因為勞顧會之前嘅共識係三日侍產假，如果議員提出修訂，就要將條法例攞番去勞顧會再商討，未必趕及今年底三讀通過喎。勞福局呢一招以退為進有冇用？好快就會知。
鄧家彪擔心侍產假條例不能在今年內通過。（資料圖片）
許柏坤昨在立法會表示，需勞顧會有共識才向立法會提交侍產假條例，遭勞工界議員鬧爆。（資料圖片）
負責答問題係勞工處助理處長許柏坤，聽見議員話要修訂侍產假後，即刻話要返去同勞顧會商討，仲話未有共識前，唔會將法例攞上立法會恢復二讀。工黨李卓人即時火滾，話勞顧會只係諮詢架構，同立法會係兩個唔同權力嘅組織，唔明白點解議員作出修訂，政府要過問勞顧會。之後鄧家彪都加入圍剿行列，話呢條法例本來有望年底三讀通過，政府如果又交番個波畀勞顧會，睇怕今年一定冇機會立法。
眼見勢色唔對，回答問題嘅許柏坤開始都唔敢講太多，話現階段唔敢下太多判斷喎。
最尾連法案委員會主席梁繼昌都睇唔過眼，話如果冇授權就唔好亂答啦！
