政壇：西九撲水林鄭立會請罪

現時集中精力處理政改事務嘅政務司司長林鄭月娥，一直身兼西九文化區董事局主席。近日西九再次捲入超支風波，本來一直避談西九只講政改嘅林鄭「醜婦終須見家翁」，周三將會親自領軍到立法會負荊請罪。因為西九現時向立法會申請三億元作「小西九」的工程撥款，其實只係「頭盤」，未來三年陸續向立法會申請過百億元撥款，先係令林鄭頭痛之處。

立法會周三召開監察西九小組委員會，據悉林鄭自知西九呢個無底深潭隨時炸到佢粉身碎骨，知道呢場難打之仗，唔可以側側膊唔多覺，所以周三佢會親身到立法會解釋超支原因，以及向一眾議員打聲招呼，等將來超支再申請撥款時都容易少少。據聞有建制派議員都睇唔過眼西九當立法會係「提款機」，睇嚟林鄭到立法會為西九「撲水」，隨時變成幫西九「撲火」都似。