練功有益身體，發展局同建造業議會大搞建造業安全周，鼓勵班建造業工友開工前練習氣功，提高工業安全，佢哋特別搵咗特首梁振英（CY）、發展局局長陳茂波（波波）及即將離任港鐵工程總監嘅周大滄等，八百多人齊集喺啟德郵輪碼頭齊齊大耍氣功「八段錦」，並創造健力士世界紀錄。

CY（前左）同陳茂波（箭嘴示）跟師傅耍八段錦，動作好似硬晒軚咁。

不過，好多與會者都未必練過，CY雖然金睛火眼望實氣功師傅嘅示範，但做出嚟嘅姿勢就差一大截，跟極都唔多似樣，見佢紮個馬步顯得硬晒軚。現場所見，好多參加者嘅動作都不堪入目，唔係步履不穩，就係擰頸變扭頭，驟眼睇真係娛樂性豐富，如果要靠佢哋向工友示範，真係要練多一排至得。

相對嚟講，陳茂波就好啲喇，似乎耍得兩吓，跟住師傅嘅示範，無八成都有七成，莫非佢平時有練開「八段錦」？

第一手消息請下載on.cc東網iPhone/iPad/Android/Windows Phone Apps