政壇：范國威咬住盧偉國唔放
立法會工務小組委員會早前審議政府擴建將軍澳堆填區建議時，主席盧偉國（WK）拒絕處理議員范國威（Gary）提出嘅「拉布」式修訂，變相「剪布」，令當日會議順利進行，政府其中一個建議亦得以通過，並提交上財務委員會。Gary對呢次「剪布」疑似心有不甘， 早前去信WK，要求WK就裁決作出書面陳詞同跟進，實行咬住WK唔放。工務小組今朝又再開會審議政府喺石鼓洲興建焚化爐嘅方案，Gary會否再向WK出招呢？
設計圖片及對白
WK上周三在工務小組「剪布」，仲話佢係參考咗主席曾鈺成喺大會對議員就《二○一四年撥款條例草案》提出修訂嘅裁決。Gary上周三就去信WK，話曾鈺成所作嘅裁決係根據立法會《議事規則》，但有關條文只限於相關法案嘅處理程序，並唔規限工務小組處理議員就政府工務工程項目建議所提出嘅議案，所以要求WK作書面陳詞解釋。另一名議員張超雄亦去信WK，聲稱工務小組並冇好似《議事規則》嘅規定，話唔准動議瑣碎無聊或無意義嘅修訂。
WK：維持秩序有責
多方夾擊下，WK都積極應戰，尋日覆信畀Gary，認為無論立法會主席，定係佢作為小組委員會主席，都係有同樣嘅責任去確保會議有秩序、公平同正當咁進行，又話Gary上周三提出嘅修訂除咗佔用委員會嘅會議時間外，並冇達致同委員會職能有合理關連嘅目的，如果當日批准Gary提出修訂，只會令委員會程序延長，唔能夠妥善行使同履行職責喎。佢冇回應人哋嘅挑戰，但就以小組委員會主席嘅職責作答，一樣有理有據。
點都好啦，政府喺將軍澳起堆填區嘅建議喺工務小組已告一段落，議員會否就興建焚化爐建議喺工務小組再玩花臣，今日自有分曉。
