安老並非草率 財爺實是草包
網絡時代，好多宅男淨係識匿喺屋企上網，唔識同人溝通，點不知班高官都係一擔擔。呢嗱，財政司司長曾俊華無所事事最鍾意寫網誌文章，搞到畀人起咗個「網誌司長」花名，佢尋日又有新搞作嘞。
上次鬍鬚曾叫拉布議員「行開」，今次又講咩呢？佢話喎，全民退休保障係非常重要嘅課題，影響深遠，唔可以草率決定，更加唔應該作為討價還價嘅棋子，言下之意，即係叫班拉布議員回頭是岸咁解。
唉，盞嘥氣啦，激進政客拉布拉到上癮，要佢哋金盆洗手喎，發夢都冇咁早啦。有拉布議員事先張揚，雖然今年輸咗，但出年一定再來，而且手法仲會更加細緻添，鬍鬚曾都係諗吓點拆招好過，唔好年年咁狼狽嘞。
冇錯，少數政客為咗出位爭選票，不停拉布，嘈喧巴閉，確係神憎鬼厭。之不過咁，如果唔係政府推卸安老責任，對全民退保拖得就拖，賴得就賴，無良政客邊有位入吖。鬍鬚曾自己就話嘞，政府自一九六六年起已經研究唔同退休保障方案，即係有關討論已經半個世紀，同鬍鬚曾年齡差唔到幾多，家陣決定推行全民退保，點會係「草率」吖，財爺「草包」卸責就真。
講到底，咩重要課題呀，影響深遠呀，通通都係推卸安老責任嘅藉口嚟啫。政府成日吹噓三根安老支柱，即係個人儲蓄、強積金同埋綜援，其實係人都知三碌支柱一早爛咗，尤其係強積金，回報同行政費用基本上成反比，打工仔退休後攞得雞碎咁多，點過世呀？嗱，家陣鬍鬚曾終於鬼拍後尾枕，承認強積金處理唔到非就業人口嘅退休保障，對低收入人士嘅保障亦唔足夠。明知強積金問題多多，點解唔索性摺埋佢呢？
正如有人建議，只要將強積金由依家勞資雙方供款變成三方供款，政府承擔一份就得嘞。港府乜都缺，就係唔缺錢，大型基建呢項延誤，嗰單阻滯，庫房每鑊閒閒哋唔見一百幾十億，班高官連眉頭都唔見皺一下，叫佢哋為安老作出承擔，就一味牙痛咁聲，唔通真係善財難捨，冤枉甘心？鬍鬚曾仲話要等埋學者研究提交報告喎，擺明拖字訣啦。
人人都會老，高官都會退休，點解對全民退保唔嗲唔吊，一拖再拖呢？鬼咩，佢哋年薪一個二個高過奧巴馬，自己無後顧之憂，對全民退保梗係你急我唔急啦。計太一叮話齋，如果鬍鬚曾每個月淨係出一萬蚊糧，睇怕佢為咗爭取全民退保，莫講話「拉布」，拉隊上街遊行佔領中環都似。叮！
