城中鏡：克勤仔暗寸黨友唔勤力？
好多立法會新丁都喺當選後投訴，話進身議會後由朝到晚都要坐喺度開會，加上工作量大運動量大減，令磅數不斷增加。不過，立法會議員陳克勤尋日出席所屬政黨嘅一項地區活動時，就話議員夠唔夠勤力，其中一項指標係佢哋體重，指該黨好多兄弟當選區議員後，都因為工作辛苦而體重驟降，佢自己嘅體重亦從來唔過一百三十磅，勉勵各位兄弟要以此為鑑喎！
陳克勤（左）話議員要減磅先算勤力，佢黨友黃容根就似乎唔多同意。
之不過，依家立法會其中一名最肥嘅議員，正正係克勤仔嘅黨友、進出口界議員「象哥」黃定光，該黨另一名立法會漁農界前議員嘅「肥根」黃容根，當年亦係愈做愈重磅，到前年棄選立法會先至開始瘦番啲。肥根尋日亦有出席該項活動，喺活動結束後仲當面寸番克勤仔「我冇乜瘦到喎」，搞到克勤仔勁尷尬。
話時話，早前多名泛民議員為咗爭取普選搞絕食，事後有人瘦咗成個碼，一直都冇肥番，唔通咁又叫勤力咩？如果克勤仔喺肥人最多又最惡嘅美國講呢番話，分分鐘會畀人控告歧視同要求索償。
