城中鏡：潘偉賢擊龍舟鼓迎端陽

平日官仔骨骨嘅阿Paul都係龍舟迷，雖然平時坐冷氣房開會多過扒龍舟，但講到埋位打鼓，絕不手震。擊鼓技巧練咗十幾年，每年端午節，佢都會參加中電龍舟隊，扒足十幾年依然樂此不疲。尋日見到盧伯伯打鼓打得咁high，當然技癢。盧伯伯帶頭做教練，同場嘅社會福利署副署長林嘉泰都邊學邊打，鼓聲咚咚響，都算似模似樣。食一隻糉閒閒哋有五百至七百卡路里，相當於一碗飯嘅熱量，打多幾下鼓，應該有助消脂。阿Paul又即場拜訪一位全場年紀最大、年屆九十六歲嘅吳春婆婆。見婆婆有副靚牙，連假牙都唔使戴，即時請教護齒心得。秘訣原來係靠「生水」，吳婆婆話，以前喺鄉下耕田時就地取材，經常用「生水」洗牙。日子有功，啲牙硬淨到你唔信。