城中鏡：姚思榮 金金大師暗巡水貨巷
早幾日經過上水港鐵站，竟然撞到立法會旅遊界議員姚思榮同幾位男士周圍視察，而且平日西裝骨骨嘅姚思榮，今次仲全身街坊look，唔通身為中旅社高層嘅佢，特登同埋幾位同事微服出巡，視察吓上水區有乜新旅遊景點？睇真啲，發現其中一位同行男士、原來係外號「金金大師」嘅北區水貨客關注組發言人梁金成，唔通連姚思榮都想搞「驅蝗」？原來金金大師係約咗姚思榮，首次親身到上水站視察水貨客為患嘅問題。
梁金成（前左）先帶姚思榮上天橋高位遠眺水貨客活動。
兩人之後返回地面，近距離直擊水貨客上貨情況。
視察期間兩人有傾有講，姚思榮（右二）直言水貨問題比佢想像中嚴重得多。
一行人喺烈日下行咗個幾鐘先收隊，個個都汗流浹背。
驚見「益力多牆」嚇親
姚思榮同金金大師由上水站出發，但行咗幾分鐘都見唔到有水貨客聚集，原來班水貨客已學精晒，唔再集中喺站內或站外活動，改為喺上水石湖墟晉科工業中心同劍橋廣場一帶上貨。好在金金大師熟晒行情，帶姚思榮左穿右插尋找水貨客蹤影。期間行經一檔水貨店時，見慣大場面嘅姚思榮，亦疑似被門外嘅一幅「益力多牆」嚇親。
喺外圍行咗約半個鐘頭之後，金金大師再帶姚思榮造訪最多水貨客聚集嘅「巷仔街」。嗰度有如七、八十年代嘅九龍城寨三不管地帶，一條三、四十米長，僅由鐵皮屋搭成嘅小巷，已有近十間水貨店，生意滔滔不絕，舖外仲明目張膽掛上「價目表」，清楚寫住「走一轉」奶粉可以賺幾多錢。「價目表」顯示，現時最搶手嘅水貨已經唔係奶粉、尿片，或者金莎同益力多等，而係一箱箱嘅蘆薈藥膏。兩人最後行咗超過一個鐘先收隊。
姚思榮事後話係第一次親身到上水視察水貨客活動，問題比佢想像中嚴重好多，開頭以為只係部分市民自發性走水貨，但現在發現係集團式經營，並已形成一個成熟嘅產業鏈。身為旅遊界議員，佢亦支持政府逐步取消一簽多行，改為一簽一行以提高水貨客成本，以及盡快喺邊境開設旅客購物中心，咁就可以減少對香港居民嘅影響，同時唔會令到啲合法商舖同水貨客冇晒生意。
