政壇：搞搞政：梁敬國爆紅 多得蘇錦樑
做咗半年有多商務及經濟發展局副局長嘅梁敬國最近人氣急升，立法會主席曾鈺成早前喺立會會議唔認得佢固然係藥引，當然亦要佢嘅上司、商經局局長Greg蘇錦樑好帶挈，當日要佢頂更出席會議，先至有呢個極速提升知名度嘅契機，事隔兩日後，阿Greg疑再次故技重施，又要梁敬國頂更出席阿Greg所屬政黨建仔搞嘅活動。
設計圖片及對白
話說梁敬國尋日趁出席建仔大埔辦事處開幕禮時，終於有機會現身說法，佢喺致辭時先問在場嘉賓「你哋識我嗎」，以一招自嘲打開序幕，其後被傳媒追訪時笑言「小事一樁，何足掛齒」，直言完全冇唔開心，隨後更多謝曾鈺成令佢「通街爆紅、一朝成名」咁話。佢咁做都算係為自己「正名」同攞番個尾彩嘞！
不過，客觀事實擺在眼前，唔少政界中人嘅印象中，阿Greg同商經局政治助理陳百里不時「行孖咇」出席活動，梁敬國反而成日形單影隻咁，佢無對此怨天怨地，反而落力護主強調三人係工作團隊、互有分工，當日頂更出席會議更係天公地道添。至於點解阿Greg尋日連「娘家」活動都唔畀面出席，有佢嘅身邊人代為解畫話，佢尋日朝早要同加拿大國際貿易部部長進行閉門會面喎。
有政界中人話，梁敬國今次其實係因禍得福，所以不必對此太上心，因為阿Greg○八年出任副局長初期一樣冇乜人識，翌年爆出「遞卡片為菲傭續約」風波，連續畀人炮轟咗一輪先至一炮而紅，相比之下，梁敬國算係以最低成本取得最大效益嘞。
