政壇：樹根嫁女轉性大講忍讓
立會議員鍾樹根堪稱建制派新一代「重炮手」，除咗向泛民主派發炮絕不留口之外，又曾以「鍾式英文」鬧爆港鐵行政總裁韋達誠日日喺辦公室「尖明（dreaming）」、公開叫港視主席王維基「收皮喇」、及斥特區管治「肯肯定」有問題等。不過尋晚佢出席一項活動時就突轉死性，致辭時語重心長強調大家要互相容忍、支持同欣賞，原來尋日佢榮升岳父、女兒出嫁嘅大好日子，自然同佢喺立會開會時嘅口脗完全唔同！
鍾樹根徐徐拖住愛女步入教堂，場面感人溫馨。
樹根愛女尋日分兩場宴請親戚、政界友好同地區領袖，下午首先喺屬於一級歷史建築物嘅跑馬地聖瑪加利大教堂舉行西式婚禮，喺立法會鬧人時惡形惡相嘅樹根，打上暗紅色花紋煲呔同以橙色主色嘅襟花，即係成個溫柔晒。佢徐徐拖住愛女步入教堂，場面感人溫馨。
晚上佢哋轉往山光道馬會會所擺喜酒，樹根多名黨友同政界友好都有到場祝賀。樹根上台致辭時自言有「職業病」鍾意講嘢，又話立法會上周五仲喺度拉緊布，好彩冇玩埋周六、日都開會，否則佢就大鑊喎。佢最後向一對新人表示，希望佢哋今後生活和諧，強調夫婦相處之道，一切在乎互相容忍、互相支持同互相欣賞，祝願一對新人白頭到老，贏得台下嘉賓連串掌聲。
