政壇：張炳推巴士重組又撞板
最新接連「爆鑊」嘅運輸及房屋局局長張炳良（張炳），先有廣深港高鐵香港段延誤同超支醜聞纏繞多時，各區區議會又對「插針樓」意見多多，據聞地區巴士重組議題，亦開始燒到埋身，其中又以新界西嘅元朗區同新界東嘅沙田區、兩個人口最多嘅地區，反對嘅聲音最大，隨時會反枱收場，令張炳又再碰壁。
設計圖片及對白
據聞政府高層評估後，認為逢地區議題必反嘅風氣不可鼓勵，擬於七一授勳時反擊，令唔撐政府嘅地區人士「食白果」，抗議示威嘅味道甚濃！
運輸署同巴士公司陸續就巴士路線重組方案到各區區會闖關，然而反應都係毀多於譽，好似最近又有沙田區議會否決相關動議，底因係大部分區議員認為有關方面名為巴士重組路線，實際上就係「有減無加」，「冇商冇量」，想「霸王硬上弓」削減多條巴士路線為實，因此群起反對否決相關建議，並反呼籲第一步應該係做好巴士轉車站、巴士轉乘優惠等工作，先再慢慢講其他事宜喎。
授勳掛鈎罰搞事者
據聞，政府高層見到地區再次出現失控場面，都認為長此下去都唔係辦法，決定以「一手軟、一手硬」應對，其中，一手軟就係以有商有量嘅懷柔安撫政策，希望慢慢同地區傾出共識，至於一手硬，就係使出撒手鐧，將重組計劃成敗同七一授勳成績表相掛鈎，畀啲顏色地區人士睇吓喎。
消息指出，部分建制派政團早前喺區議會討論巴士路線重組時，表現仲激過班激進泛民，又示威搗亂，又向官員掟嘢，但轉個頭佢哋又同政府扮晒老友，要求向佢哋啲成員頒授太平紳士或其他勳章名銜，做法令政府高層側目，所以政府高層今年有意令逢地區議題必反嘅地區人士「空歡喜一場」，即係咪使旨意可以做少少嘢，就可以「以小博大」得到嘉許，等大家明白無免費午餐嘅遊戲規則，又可以撲熄地區燎原嘅星星之火。
究竟政府突然強硬起嚟嘅成效如何，相信好快會明朗化。
