南亞大軍霸地頭 露宿擾民官懶理

件事係咁嘅，近年因為市區重建同租金狂飆，無殼蝸牛紛紛流落街頭,而且加入一批外國人添。呢，本報記者發現，佐敦炮台街公園一帶同油麻地渡船街天橋底，有近三十名南亞裔人士進駐，搭咗十幾個帳篷，擺明以此為家。當中有人等緊上公屋，亦有懷疑非法居留人士，佢哋同聲同氣，樂也融融，不過，附近居民就一啲都唔樂喇。

房屋問題積重難返，愈來愈多人要瞓街，本來不足為奇，問題係，呢班包括外籍人士在內嘅露宿者，陣容不斷擴大，衍生唔少問題，對附近居民同商戶造成極大滋擾。嗱，有人亂揼垃圾，有人亂放雜物，傳出陣陣惡臭，加上夜晚經常聚集，喧嘩吵鬧直到凌晨，搞到周圍嘅居民冇覺好瞓。咁都唔止吖，露宿者造成噪音不斷，衞生惡劣固然惡頂，治安問題更令人擔憂，有經營玉器嘅商戶投訴，曾經喺附近花槽見到有針筒，舖頭貨物更周不時不翼而飛，希望當局盡快解決露宿者問題，減少滋擾。

可惜吖，旨意港府做嘢嘥氣嘅咋。有關注露宿者團體負責人踢爆，社署登記嘅露宿者數字，比佢哋調查嘅結果少咗超過一半。你話啦，港府官僚連幾多人瞓街都未搞清楚，點靠得住o架。本港房屋問題不斷惡化，加上難民湧港，問題更加一發不可收拾。有立法會議員批評港府難民政策同本港情況脫節，促請當局審視喎。

講開難民政策，又係一筆糊塗帳。當年司法機構假仁假義，獨斷專行，裁定廿幾名持「行街紙」嘅南亞裔人士可在港合法打工，自此之後香港就好似無掩雞籠咁，各地難民源源不絕湧入，欲罷不能。數字顯示，入境處接獲嘅酷刑聲請累積多達一萬二千幾宗，超過五千人滯留香港，當中唔少其實係「經濟難民」。呢班人喺蘭桂坊、尖沙咀等地搵食，黃賭毒黑樣樣齊，搞到區內烏煙瘴氣。

講番露宿者呢筆，社署回應話，一直不論種族為露宿者提供服務喎，擺出一副公平公正、一視同仁嘅姿態。其實唔使打官腔嘞，當局支援不足，加上難民政策不合時宜，令露宿問題雪上加霜，港產官僚居然用「一視同仁」為自己無所作為做擋箭牌，擺明玩卸膊啫。請問係咪要等呢班露宿大軍進駐政府總部，當局至肯做嘢吖？叮！