SUN搞作：少膽虫手記：我是被迫的
「少膽虫，你依家係咪玩失憶！」淫賤黎一邊喝罵一邊舞弄菜刀，嚇得少膽虫心肝仔噗噗跳。「腦……腦細，我記起喇，上次有兩毫子未找畀你，即還即還！」本虫正喺褲袋摷嚟摷去之際，冷不防淫賤黎舉刀一劈，向來以閃功見稱嘅我雖然幸保不傷，但案頭嘅《爛果》已經分屍兩截。
「虫，你明唔明份《爛果》點解咁易分屍？」覺得人身安全受威脅嘅我，擦鞋力量大爆發，即時擦擦擦擦擦：「腦細，梗係因為你內功深厚啦，你要劈，肯肯定冰山都劈得開！」兜巴打來，本虫金星四冒，只聽見淫賤黎怒吼：「係因為《爛果》無內容又無廣告，咪一劈就分屍囉！講到依家，你到底知道自己唔記得做乜未？」
唉，正所謂禍從口出，梗係我平時吹水話會做好《爛果》，淫賤黎依家同我計數啦！「腦細，我應承你，好快會做好……」一巴又一巴又一巴，淫賤黎用暴力將我封口，有佢講冇我講：「旨意你做好，魚蛋都識飛上太空啦！我係講緊炒人節流單嘢呀！你條虫咪再拖！依家我畀最後機會你，唔出去同我大屠殺慳荷包，我就開你刀！」偌大嘅房間，就只剩低本虫同一把無情刀……同事們，唔好意思，我來了。
