隨住近年立法會出現「拉布」，立法會主席就令「剪布」成為咗香港獨有嘅潮語。根據維基百科嘅資料，「拉布」係上世紀初由外國議會嘅議員發明。目的係以冗長嘅馬拉松式發言，去拖延議案表決，甚至令到議案不能表決，最嚴重係令到議會運作癱瘓。「剪布」就係指議會議長運用權力或特殊手段，去中止議員「拉布」。

立法會議員鍾樹根Tree根哥繼肯肯定事件後，又有代表作。話說日前，佢用英文質詢港鐵CEO，內容振振有詞，問對方返工係咪發緊夢，仲質疑佢到底有無返工。可惜啲英文文法就錯晒！佢嘅垃圾英文即刻喺網上遭到恥笑。講真，今時今日嘅立法會議員嘅質素，比起港英時代真係差天共地。立法會變咗垃圾會，歸根究柢都係因為亞爺屈機，用啲蛇齋餅糉阿公阿婆掌心雷，將啲低質素建制派議員安插入立法會。立法會本來嘅功能係監督政府，但係依家喺一班建制派佔多數，加埋功能組別分組點票機制底下，立法會就淪為吹水會。特區政府政策有建制派保駕護航，要通過真係無難度。少數進步民主派要求政府搞「全民退保」同要求政府派錢，就惟有用「拉布」手段，拖延財政預算案通過，試圖逼政府聆聽訴求。可惜，立法會主席都係一個徹頭徹尾嘅建制派，你「拉布」佢「剪布」，手起刀落，返嚟就郁！

喺英美呢啲民主國家，議會政治已經有二百年歷史，「拉布」及「剪布」已經有相當嘅規範。香港嘅議會雖然都有百幾年歷史，但係香港人真正透過選舉參與，都只係二十幾三十年。所以，關於「拉布」及「剪布」其實無特殊規定。議員係有權去「拉布」，但係香港法例同立法會議事規則都無賦予立法會主席任何權力去「剪布」。所以，每次曾主席要「剪布」，都係要夾硬搵啲理由出嚟「剪布」。「拉布」亦同時係一個足球術語，意思係球賽期間，球員帶住個波唔進攻去拖延時間。不過，球證係無權去剪布。只有等球賽時間夠鐘先可以吹雞完場「剪布」。講開立法會主席曾鈺成，「拉布」嘅長毛話佢講大話。但係曾主席竟然話議事規則無限制主席唔可以講大話！吓？咁都得？有咩唔得呀！「剪布」夠唔得啦，咪又係剪！主席大晒！

第一手消息請下載on.cc東網iPhone/iPad/Android/Windows Phone Apps