政壇：搞搞政：力撐創科局 莫乃光變夾心人
政府重推創新及科技局，仲打算喺下個月向立法會提出決議案，資訊科技界立法會議員莫乃光（Charles）支持成立創科局，仲搶閘喺立法會內務委員會提出成立小組委員會討論，點知就畀泛民鬧爆，質問佢成立創科局後，業界係咪有錢分？公民黨議員郭家麒仲講到話要同Charles「割席」添。結果搞到Charles都喺會上扯火，為咗開新局，佢真係被迫做業界、泛民及建制派嘅多層夾心囉。
設計圖片及對白
尋日內委會就討論係咪就政府設立創科局成立小組委員會，資訊科技界一直唔滿意上屆政府「殺局」，Charles係業界代表，當然唔會同業界唱反調，尋日會議上，佢落力為自己建議成立小組委員會拉票，建制派一面倒支持佢，但民主派就撕破面皮咁鬧爆。
黃毓民質疑係咪有錢收
一早揚言拉布嘅議員陳偉業就質疑，政府話要咩，有議員就支持咩，簡直係話搵香港人笨。議員黃毓民就批評設立創科局係架床疊屋，為開局加多約三十個職位，係浪費公帑，仲問Charles業界支持創科局係咪有錢收喎。Charles聽到毓民咁講亦扯火，批評毓民侮辱咗業界，希望大家可以支持成立創科局，畀條路年輕人行吓。雖然泛民唔係投反對票就係棄權，但喺建制派支持下，動議最後都係大比數通過。
