政壇：李秀恒傳分選兩商會會長
中華廠商聯合會（廠商會）將於年底前選出新會長，無獨有偶，中華出入口商會（中出）據講亦已啟動選舉工程，大約喺十月份選出新班子，明年初就會換屆。聽聞今次幾位中出副會長都有興趣參選，包括張學修、許華傑（Michael）及李秀恒（Eddy）。咦？Eddy唔係想選廠商會會長嘅咩，點解喺差不多同一時間舉行嘅中出會長選舉又會有佢份？
向佢求證，佢聽咗都打個突：「吓？冇諗過喎！你咁講我都好突然。」咁佢係咪繼續堅持參選廠商會會長？Eddy就好輕鬆話，選會長係年底嘅事，依家忙住公司嘢先喇，唔得閒諗住。不過，可靠消息人士話畀我哋聽，早喺一○年底中出換屆選舉時，Eddy當時已係最資深嘅副會長，照計輪到佢做會長，但由於當時Eddy忙於公司轉型及幾項大型投資，怕抽唔到時間，所以先讓畀現任會長莊成鑫做。
許華傑難一人戴兩帽
據聞去年初莊成鑫連任前，曾經請Eddy做番會長，但都被對方婉拒。日前中出啱啱成立由十一人組成嘅換屆委員會，籌組下一屆新班子嘅推薦工作，莊成鑫、張學修、Michael及Eddy都係成員，其中張學修、Michael都有意參選會長，但係Eddy確實無表態過。至於Michael，已被勸服打消參選會長念頭，事關佢仍然爭取緊喺一六年代表中出參選立法會進出口功能界別，冇理由到時一人戴兩頂帽、即既係中出會長，又係立法會代表咋，容乜易顧此失彼呢？會中重量級大老又認為，老成持重、又有時間投放喺商會嘅人做會長最好，所以，大家都傾向支持做過海南商會會長嘅全國政協張學修接棒。
