政壇：名人憂心新疆多過泰國
近日時局動盪，名人各有各憂，香港品牌總商會副會長黃業光（John）話，佢有朋友喺新疆經營五星級酒店，睇見暴徒橫行，又斬又殺，嚇到有得震、無得瞓，近日連街都唔敢去，暫時匿埋屋企先。
黃業光擔心新疆好友，多過擔心身處泰國朋友。
趙振國話，泰國政變係家常便飯。
至於泰國局勢，阿John自爆話，泰國政變後，有喺當地經商嘅友人致電報平安，話人身安全無問題，不過手上揸住唔少泰國股票同埋物業，近日泰銖暴跌，都咪話唔驚。咁又係，泰國政變後接住實施宵禁，三日內即刻有逾四億美元外資逃離當地股市，長遠好影響外資對泰國嘅信心。
該會會長兼「假髮大王」趙振國就話，泰國三幾年就政變一次，改朝換代係「家常便飯」，似乎未驚過，反而佢對新疆頻頻發生恐怖襲擊憂慮啲，話炸死無辜百姓冇陰功。
