宋衞平喺記者會上為出售綠城股份解畫，承認自己唔係賭場上嘅勝利者。
內地房地產市場逆轉，啱啱又傳出上市嘅兩房企綠城同融創有新交易，即包括創辦人宋衞平在內嘅三個股東落實賣出部分股份畀融創，市場唔少傳聞，尋日兩間公司嘅高層喺杭州開咗個記者會，向包括中港兩地媒體解畫，對於有人爆料，指綠城嘅宋總因為爛賭，所以先要賣走心血企業嘅股份喎，宋衞平並冇迴避此說，但話呢樣只係佔賣股原因嘅百分之一至三。
宋總話，自己唔係賭場上嘅勝利者，而賭博係人生多種娛樂嘅其中之一，佢又話，喺未退休之前，都唔算係快樂嘅旅遊者。
至於未來嘅公司業務，佢透露，以後佢負責嘅包括養老、代建及農業嘅非上市公司業務會加埋一齊，改名叫「藍城」，因為自己喜歡藍色，而比重大概佔上市公司嘅四分之一至五分之一。他相信「藍城」未來一定會超越融創，不過佢都唔好意思咁講，「剛剛將綠城交給老孫（融創主席孫宏斌），我馬上就要超過他，這不太好，三年內不說這個話。」
至於綠城足球隊方面，市場都關注宋衞平係唔係會賣畀分屬同鄉嘅馬雲，宋衞平只係笑住咁話，願意將球隊都畀佢，到時就有好多外星人嚟踢波喇！
第一手消息請下載on.cc東網
