立法會拉布戰尋日終於落幕，但落幕卻加插一段有官冇人識嘅糗事。尋日下晝三點半，商務及經濟發展局副局長梁敬國（Godfrey）代表政府坐喺官員席聽議員發言，但全程無人認得佢，連一向精明嘅主席曾鈺成都唔知佢係乜水，真係(火羅)爆！

梁敬國

蘇錦樑勁晒對新鞋，風騷到冇人信。

立法會尋日復會後冇耐，社民連梁國雄（長毛）突然問曾鈺成，政府現時派出邊個局嘅官員列席？被考起嘅曾鈺成望向官員席，望足Godfrey幾秒鐘，認唔出，只好睇貓紙，氣氛極之尷尬，期間成個議事廳鴉雀無聲，只得長毛不時發出幾次訕笑聲。最後曾鈺成惟有向身旁嘅秘書求救，兩人研究咗十幾秒，曾鈺成口窒窒咁宣布，按照政府嘅通知，呢節出席嘅應該係環境局官員。嘩，Godfrey聽到主席咁講，面色真係好難睇，猛咁苦笑搖頭，最後曾鈺成惟有叫Godfrey介紹吓自己，畀班議員笑到面黃嘅梁只好照辦。

下屬咁尷尬，商務及經濟發展局局長蘇錦樑（Greg蘇）尋日卻心情大靚，傍晚好風騷咁喺立法會周圍晒佢對新鞋。

蘇錦樑話，尋日朝早去咗中環嘅元創坊（PMQ）參觀，仲用咗二千幾蚊買咗對由本地設計師設計嘅新款皮鞋。睇到呢度，大家都知道佢畀幾多心機打呢份工喇！

第一手消息請下載on.cc東網iPhone/iPad/Android/Windows Phone Apps