政壇：高官同區議員鬥吐苦水

政府考慮到長遠房屋策略督導委員會提出，未來十年興建四十七萬個單位嘅建議，近月陸續向相關區議會提出土地房屋發展用途嘅文件，據聞沙田區區議會前日開會本來都討論呢個問題，建議一次過改變當區十二幅地嘅用途，只係唔知咩原因臨時取消咗個議程，有地區人士估計，應該係政府收到風，知道地區反響好大。唔知尋日都有赴會嘅沙田區議會主席何厚祥係咪壓力好大呢？據講，政府提出土地用地嘅文件後，喺地區頭頭碰着黑，唔單止有建議被否決，有區議會仲因為傾呢個議程而搞到流會添。

區會被指搬龍門

講番CY尋日特邀沙田、葵青、元朗區議會主席同黃大仙區議會代表探討呢件事，發展局局長陳茂波、房屋及運輸局局長張炳良、民政事務總署署長陳甘美華及相關政策局副局長等都係座上客，據悉，有官員喺會上話，當局已盡力搵地建屋，但做好事都得唔到區議會支持，質疑區議會「搬龍門」。區議會代表就掉轉槍頭，強調佢哋完全支持興建公共房屋，反指政府缺乏誠意，有人仲反插地區官員出席佢哋嘅會議時乜都說不、答唔到嘢，好唔專業喎。

身兼元朗區議會主席嘅立法會議員梁志祥會後都向記者話，今次午宴反映咗政府同地區仲未協調，似乎雙方嘅鴻溝真係好大喎！

不過，尋日都有啲搞笑嘢，席上人透露，CY聽完官員同區議會代表狂呻後，即時叫在席嘅兩名局長攞出卡片，嗌區議會主席遇到土地房屋發展嘅問題，可直接搵佢哋喎。搭通天地線可唔可以少啲叫苦，即管睇吓囉。