行政立法亂鬥亂 縱使剪布也枉然

針對財政預算案嘅拉布戰又長又臭，搞到神憎鬼厭，怨聲載道，立法會主席曾鈺成尋日終於出手剪布，為餘下辯論定出時間表，限制議員發言時間，預計下月四日可望完成所有審議程序。對於呢個剪布行動，反拉布議員梗係舉腳贊成喇，不過拉布議員就強烈抗議，指有關裁決缺乏理據，剝奪議員權利，仲揚言考慮提出司法覆核添。

即係咁，濫用拉布不得民心，主席剪布係意料中事，問題係，呢種治標不治本嘅補鑊行動，究竟有幾大意義呢？埋單計數，預算案拉布戰打咗十幾日，合共近百個小時，期間議會運作癱瘓，大量公帑被浪費，全個社會淪為輸家，呢筆帳應該向邊個追討呢？講真，拉布鬧劇贏盡收視，搞事議員早就抽夠油水喇，依家剪布等於搭個台畀佢哋謝幕，講得好聽叫鳴金收兵，講得唔好聽就係落雨收柴。

依家最大嘅問題係，拉布歪風不斷蔓延，已經成為立法會常態，就算今次成功剪布，下次鬧劇又嚟上演，沒完沒了，剪之不盡。呢嗱，除咗預算案受到狙擊，連「一堆一爐」及新界東北發展前期工程撥款申請亦遇到拉布，正如港府話齋，簡直係「三線拉布」，今次就話可以剪布啫，下次又點呢？激進議員企喺道德高地，利用議事規則漏洞及港產官僚嘅無能，千方百計阻止議案通過，導致港府施政癱瘓，咁搞法，大家都冇運行嘅咋。

本來呢，審議預算案係立法會嘅權利，監督政府係議員嘅職責，弊在喺畸形制度之下，只要有一個議員唔滿意議案，隨時都可以發起拉布，搞到立法會烏煙瘴氣，港府固然束手無策，而市民就算反感亦無可奈何。

所以話，香港不斷沉淪，唔係冇原因o架。立法會淪為「垃圾會」，終日吵吵鬧鬧，掟蕉爆粗，已夠丟人現眼喇，家陣仲染上拉布癮，好似癌細胞咁，香港想有運行都難。唔怪得香港競爭力跌完又跌喇，繼中國社科院警告香港優勢弱化，後勁不繼，遲早被內地城市後來居上，瑞士洛桑國際管理學院發表嘅全球競爭力報告，香港排名由舊年嘅第三跌至梗頸四，反觀新加坡連升兩級至第三位，後來居上，你話香港係咪丟架吖！

治病治病源，香港唔想坐以待斃，必須做大手術，如果可以將行政立法嘅癌細胞統統切除，或者仲有得救嘅，叮！