城中鏡：王日明細訴利邦九年情
隨住利豐集團改名馮氏集團、利豐新一代話事人接棒入董事局、分拆利標品牌獨立上市等，已明顯見到新人事新作風嘅幹勁，終於利邦董事總經理王日明亦隨之變動，回歸馮氏集團，正式告別利邦。
王日明早年為利邦開荒，由上市、收購到打入中國市場都有份參與。
王日明尋日last day，但都好盡責參與利邦整個股東會議程，仲一貫紳士作風咁話離別在即，亦無不捨之情。今年係佢加入利邦第九個年頭，睇住利邦嘅中國網絡規模逐一建立、由工廠變為零售商、由香港公司至今收購三個國際品牌，發展利邦成為國際品牌嘅第一階段都算完成。為公司好，佢舊年更主動提出搵新CEO，主要為配合公司長遠發展，包括提升品牌國際知名度等。
前晚集團高層已為佢搞咗歡送晚宴，雖然佢冇透露老闆有冇特別贈言，但就多次話自己會繼續喺馮氏集團旗下零售業務內辦事，只係轉咗地方。不過，今個夏天新工作未能真正調職，因利邦新CEO Richard Samuel Cohen雖熟悉國際歐美同高檔男裝市場營運情況，但對中國市場認識不夠，王日明話會協助新CEO了解公司同內地市場情況。
