城中鏡：羅永順情繫九龍城 接掌樂善堂
九龍樂善堂常務總理會尋日舉行就職禮，Andrew羅永順喺前主席韓世灝手上接棒成為新一屆掌舵人，延續服務社會嘅責任。講起佢同樂善堂嘅淵源，佢話細個因為喺呢區搭飛機，又會經常喺九龍城區食嘢，所以對呢一區充滿獨特情感，佢期望未來一年着手幫助較少人關注嘅社群，例如老人同少數族裔等。
羅永順（中）原來同羅詠詩（右）及羅少雄（左）都係羅氏宗親會成員。
劉文文（左）重返樂善堂「降班」做總理，仲帶埋細佬劉文東（右）一齊加入。
食物及衞生局副局長陳肇始（左起）、謝凌潔貞同署理民政事務局局長許曉暉齊撐樂善堂就職禮。
見Andrew同香港吸煙與健康委員會主席Lisa劉文文老友鬼鬼，原來佢哋已相識多年。話說Andrew當初喺Lisa爸爸介紹之下加入樂善堂，皆因佢哋兩個家族都係布業世家，二人父親非常熟落，所以下一代都變成世交。曾任樂善堂主席嘅Lisa已離開咗一段時間，佢就笑自己要「降班」做番總理，仲帶埋細佬劉文東一齊加入添！
同場仲見到羅氏宗親會成員羅少雄同Anthea羅詠詩現身支持Andrew。Anthea就大爆副主席Kyran施家殷曾當選過某酒品牌香港型男。Kyran就透露一直有做男士美容，每星期都會搵兩日保養，仲開心分享近日植髮嘅成果，發現前額真係多咗啲頭髮，喜上眉梢。
謝凌潔貞當廁所冇人用？
早前因為「廁所上堂」言論惹來批評嘅教育局常任秘書長謝凌潔貞亦有出席，被問到其言論係咪過激時，佢澄清絕冇醜化教育界嘅意思，只係諗住舉個具體例子，等大家明白好難喺學校搵到另一個冇人上堂嘅空間。至於點解唔用禮堂或操場做例子，佢解釋係因為呢兩個地方都可能會喺唔同時段有人上音樂或體育課喎。照佢咁講，莫非廁所就冇人用嘅？
