有位朋友替家中長者買含鈣質成分的營養奶粉，藥房店員指該牌子奶粉確是搶手，店內只賣剩一罐，因來貨時撞凹了個罐，遂被揀剩下來，並打趣的說減收廿元出售，朋友查看該罐奶粉，除被撞凹外，別無異樣，便買回家去。

家中長者撕開內置密封的鐵蓋，發現罐內的奶粉跟以往的顏色不同，沖一杯試飲，味道亦不一樣，於是拿出上一個空奶粉罐對比吓，發覺新買回來的那罐外殼印製較為粗劣，心知可能是假貨。

翌日，朋友帶同「假貨」返那藥房「退貨」，怎知店員話鐵蓋撕開過，反指我朋友調換原裝奶粉都可以，堅決不肯認賣假貨，還煞有介事的呈示「入貨單」，以資證明貨源來自正規發行商，咁情況，這批貨次出了甚麼問題呢？

有業內人士告語，現今不少藥房，先向正規發行商購入少量「正貨」，背後卻賣「假貨」。通常，在店面擺放展示的多是「堅嘢」，但當（目及）到「無經驗的生客」或「急忙掃貨的大陸客」，便出盡蠱惑推銷啲「流嘢」，反正，生客未飲過此牌子的奶粉，無從比較，便易過骨；而大陸客買完返回內地，也甚難追究，所以，家陣藥房便愈開愈多囉！好搵嘛！

我在諗，啲藥房老闆無良，將來落地獄啫！但香港政府又點處理這些街知巷聞的騙案呢？只作「警訊式」呼籲？便任由罪案不斷日復日地行騙下去？

當年，大陸發現的「假奶粉」從無「銷毀」的報道，那批食壞人的「毒品」，去晒邊呢？幾千萬公噸的呀！真驚驚……

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

第一手消息請下載on.cc東網iPhone/iPad/Android/Windows Phone Apps