政壇：搞搞政：搵人接替翟紹唐 監警會頭痕

對於新任主席人選，盛傳監警會早有委員毛遂自薦，可惜當事人多年來是非多多、缺乏法律背景兼其「梁粉」色彩濃厚，未「起跑」已宣布被叮走。

另有局內人透露，律政司曾向保安局推薦一位資深大律師出任，可惜嗰位資深大狀埋門一腳「縮沙」，令遴選過程再添波折。

眾所周知，監警會主席唔易做，除咗要喺警方、市民之間保持中立，仲要經中央政策組全職顧問高靜芝同保安局首肯「過兩關」，加上政府向來有不成文規定，監警會主席傾向由資深大律師或退休法官出任，所以過去四任監警會（前稱警監會）主席都係由資深大律師出任。

全港資深大律師加埋都冇一百個，要搵無黨無派又肯捱義氣接掌呢個燙手山芋嘅資深大狀更係少之又少。難怪有委員坦言，即使新任主席破例由非資深大狀出任都唔驚訝，因為實在太難喇。咁現任主席翟紹唐有冇可能多坐一會？據知監警會一眾同事本月初先為翟舉行歡送派對，翟個人亦早已表明無意破例續任，要佢回心轉意似乎唔係易事。