何俊賢借「剪布」名義請大家食新鮮鹽水雞。
立法會主席曾鈺成尋日宣布「剪布」，一眾建制派議員即刻開心到彈起，漁農界議員「高佬賢」何俊賢仲話要請大家食雞慶祝。大家以為佢講吓就算，點知佢下晝真係搵咗十隻新鮮鹽水雞畀大家品嘗。高佬賢話，下星期仲有東坡肉供應，因為有議員已經落咗特別柯打，指明要食東坡肉，想考驗吓佢啲新鮮豬肉係咪咁好食喎。
漁農界前議員黃容根最出名拎啲新鮮雞同燒肉返立法會請人食，個個議員次次都食指大動，但高佬賢做咗兩年漁農界議員，原來未曾履行呢個「傳統」，尋日佢就借「剪布」名義拎啲新鮮雞慰勞吓大家。高佬賢話希望藉此推廣新界農產品，所以除咗鹽水雞外，仲有元朗烏頭，但又怕大家食唔晒咁多，惟有下星期再請過。
有「肥老闆」外號嘅金融服務界議員張華峰，知道高佬賢請食雞都仲未夠喉，開到聲話要食新鮮東坡肉，高佬賢當然唔會拒絕啦，但張華峰已經身形龐大，如果仲食咁多肥肉，睇怕對身體唔係咁好囉。
第一手消息請下載on.cc東網
